KRAKALDIRAKO "KIT"a Espazio Irekirako (uzt 21) gonbidapena

Nola prestatuko dugu KIT on bat KRAKaldi honi aurre egiteko? Zein jakintza, desira, tresna edo beharrizan eskain diezaiokezu komunitateari?

http://www.kitkrak.org

Garai nahasiak bizi ditugu, mundu mailako krak momentua, non krisi ekonomikoaren aitzakiapean, baloreen eta eredu kultural, sozial eta politikoaren krisi sakona ezkutatzen den. Krisi honen itzalpean gero eta jende gehiagok uste du aldaketa beharrezkoa eta posiblea dela.

Etorkizuneko aukera xumeak, baina era berean, iraunkorrak eta bateratzaileak, elkarrekin proposatzeko garaiak dira: sareko lana, do it yourself eta do it together; kultura askea, etika feminista, etika solidarioa, permakultura, hazkundea geratzea eta guztien ongiarekiko konpromisoa eta erantzukizuna. Ideiak, kezkak eta proposamenak partekatzeko garaia... Jakintzez, desirez, tresnez edo norberaren beharrez osatutako KITak, denen artean benetako aldaketa baten alde lan egin ahal izateko.

Egoera honetan, KIT-KRAK-etik Open Space izeneko ekimenera gonbidatu nahi zaitugu. Autoantolakuntzan oinarritzen den eta sormena eta emaitza onak sustatzeko aukera ematen digun eztabaidarako metodoa da. Kezkatzen gaituzten gai guztiak landuko ditugu eta ideia guztiak amakomunean jartzeko aukera izango dugu. Jardunaldia bukatzean, elkarrekin landutako ideien dokumentua izango dugu.
                           
Gai honen inguruan hitz egiteko eta eztabaidatzeko denbora hartu nahi dugu, ez baikara normalean horrelako kontuez gehiegi arduratzen. Gaur egungo eredu sozial, ekonomiko eta politikoari buruzko analisi kritikotik, etorkizuneko aukerak irudikatu eta asmatzeko proposamen-sorkuntzara pasa nahi dugu, beti ere talde-lanean eta elkarri lagunduz. Aukera ezin hobea jende desberdina elkartu eta nahasteko, mugak gainditzeko, jarioa ahalbideratzeko, gure amets eraldatzaileak sortzeko eta aurrera eramateko.

Open Space ekimena uztailak 21ean (osteguna) izango da 10:30etik 18:00etara (baina metodologia irekia izango denez, ez da zertan denbora guztian bertan egon behar), Bilboko ZAWPen (Deustuko Erribera 47, behea, info+: http://www.zawpbilbao.com).
Ekimenaren dinamikan laguntzeko Eleder Aurtenetxe izango da gurekin (http://in-fluyendo.blogspot.com). Han bertan bazkalduko dugu paella eder bat. Etortzekoak bazarete, konfirma ezazue uztailaren 19a (asteartea) baino lehen, prestatze-lanak errazteko. Bidal iezaguzu mail bat helbide honetara info@kitkrak.org  edo deitu telefono zenbaki honetara: 944 158 861

Beroketa-ariketekin hasteko, hona hemen hainbat galdera: Zeintzuk dira gaur egungo gizartean aldatuko genituzkeen gauzak? Ba al duzu proposamen zehatzik? Lehentasunen mapa egiteak merezi al du? Zer egin dezakegu eta zer ez dugu egin nahi? Nola kudeatuko ditugu ondoren eremu huts horiek?Nola ekin dezakegu gure txikitasunetik agertoki honetan? Zer aldatu behar dugu gure baitan bertan? Nola desikasiko ditugu orain arte ikasi ditugun patroi indibidual zein kolektiboak?

Zeintzuk dira beste lekuei eta garaiei buruz ditugun erreferentziak? Ba al dira ereduak hau guztia aurrera eramateko? Aplika al daitezke gaur egungo gure testuinguruan?Nola lortuko dugu gure kontraesanak, geldiarazi beharrean, aldaketarako hazi izan daitezen?Nola mantenduko eta elikatuko ditugu aldaketarako itxaropena eta ilusioa? Nola garatuko genuke ekintza eraginkorra eta dibertigarria? Nola sortuko ditugu energia anplifikadoreak Bilbon?..... Makina bat galdera eta oraingoz, oso erantzun gutxi.

Uztailak 21ean ikusiko dugu elkar!
ANIMA ZAITEZ
________________________________________________________________________________________

KIT-KRAK udako auzolandegia da. Bilboko ZAWPen egingo da, uztailaren 18a eta 29a bitartean eta ColaBoraBora-k antolatzen du. Helburua gizarte berria (ez da gutxi!) prototipatzea da. Hainbat jakintzaz, desiraz, tresnaz eta beharrez osatutako KITak dakartzaten pertsonak bildu eta talde-lanaren bitartez eta elkarri lagunduz, gaur egungo KRAK egoera honi aurre egingo dioten aukerak proposatuko ditugu.

KIT-KRAK ekimena Colaboradora-k gizarte berrikuntzarako EUTOKIA zentroan duen ekintza-programazioan kokatzen da. Eusko Jaurlaritzako Kultura Saileko Gazteria Zuzendaritzaren Nazioarteko Auzolandegien AUZOLANDEGIAK 2011 Programaren barnean dago eta Lan Ekintza, ZAWP Bilbao-ren laguntza jasotzen du.

Open Space ekimenaz gain, KIT-KRAK-en hitzaldiak ere izango ditugu eta bertan parte hartzera animatzen zaitugu:

Uztailak 19, asteartea: 18:30etik 20:30era.
- Economía feminista, Begoña Pecharromán. Co-directora de Farapi
- Decrecimiento y ciudades en transición, Desazkundea
 
Uztailak 20, asteazkena: 18:30etik 20:30era.
- Territorio, ciudad y creatividad, Adolfo Chautón, de Exterrae
- Retrospectiva del movimiento 15M, Personas involucradas desde el contexto local.

Eleder BuM31    Mind Mapping-Open Space Technology-Creativity

www.burumapak.blogspot.com (eus)   @Eleder_BuM  (Twitter)
www.in-fluyendo.blogspot.com (esp)   www.flowandshow.blogspot.com

HITZ EGIN DEZAGUN ZORIONTASUNAZ

Esker mila Pako, Berria,... oso beharrezkoa, atsegina eta hurbila atera zaizue pieza hau... twitterlandetik bloglanda ekartzeko premia ere sentitu dugu, pentsa!

  http://paperekoa.berria.info/iritzia/2011-07-01/004/001/hitz_egin_dezagun_zoriontasunaz.htm

Eta, bada ez bada ere, bertara kopipeistatuko dut, horrelako perlak galtzea pekatu litzake eta :-)!

HITZ EGIN DEZAGUN ZORIONTASUNAZ

PAKO ARISTI (Berria, 2011.VII.1)

Artikulu honen lehen lerroan gauza bat aitortu nahi dut: Zoriontsu naiz. Eta alderantziz beharko lukeen arren, gertaera horrek arazo handiak sortzen dizkit: ez dut aurkitzen norekin partekatu nire sentimena, jendeak ez baitu zorionaz hitz egiten, ez du hitz egin nahi ere. Ez dut kausitzen lagunarterik zoriona ardatz, hizketagai eta lanketa izango duenik, zorionak batuko gaituen talde bat, hala nola batzen duen jendea futbolak, joera politikoak, gimnasioak, ikastaro berean izen emateak edo auzo batzordean egoteak.

Jendeak ez baitu zorionaz hitz egiten entzun nahi, ezin duzu inon oso altu esan zoriontsu zarenik: arraro begiratzen dizute («zer hartu ote du?»), etsipenez («gizajoa, okerrera egin du»), gorrotoz («nik adina lan egingo bahu») edo mendeku gosez («eroriko haiz bai»). Zu eroritzea nahi dute, neurritik aterata bazeunde bezala. Zoriontsu izatea neurriz kanpo bizitzea balitz bezala, justu kontrakoa denean: zorionak behar luke gure mundu igaroaldiaren neurri bakar.

Zorigaitzak partekatzeari elkartasuna deitzen diogu, baina, zinez, zoriona partekatzea izango litzateke elkartasunik ederrena. Ezinezkoa bihurtu da: jendea ofenditu egiten da zure zoriona partekatzera joaten bazara haiengana. Egunkarietan ere zoriona ez daukate gai seriotzat; iritzi orri hauen serietatearen erdian 'Zoriona' jartzea titular moduan irrigarri eta erdeinagarri gertatuko zitzaizuen gehienoi.

Hitz antzua bilakatu da zoriona: alde batetik derrigorrezkoa, gure desioez itauntzen digutenean; bestetik serio hartzen ez duguna, urteek sendatzen duten gaitz bat balitz bezala. Infantilizatu dugu bere potentziala, karikatura bihurtu dugu, auto-laguntzako liburuen eskuetan utziz, inozoen helburuetara marginatuz. «Zoriontsu naiz» esatea umekeriatzat hartzen da hemen, heldutasunera iritsi ez den baten erreakziotzat, heldutasuna zorionik existitzen ez den lurralde bat balitz bezala, zoriona hizketagaitzat hartzea ere merezi ez duena.

Gauza onak ere ez ditugu esaten apenas, «disko polita atera duzu», «ze ilejera polita daukazun», «zure irribarrea beti gustatu izan zait», «zer praka xalauak», «zer pintxo gozoa atera zaizun»… Erronka tankerako esaldiekin agurtzen dugu jendea, naturalagoak agertzen garelakoan, baina errepresio emotibo bat besterik ez da, pobretzailea eta ankerra. Hain galdua dugu gauza politak entzuteko ohitura, non halakoren bat esaten duzunean harri eta lur begiratzen dizun besteak. Baina laster hedatzen da anbientean halako gozotasun infinitu baten lurrina.

Zorionaren aurkako alergia sufrimenduaren gorazarreak sortzen du. Sufrimendua asko baloratua dago, alor guztietan, eta egunkarietako azal eta orri nagusiak sufritzen duen jendez beterik datoz, gizarte eredu bilakatzen den jendea. Gure menditzarrak korrika igotzen dituztenak txalotzen dira albistegi guztietan, maratoiak egiten dituztenak, edozein ariketetan hesteak botatzeraino lehertzen direnak.

Duela gutxi irakurri dugu hiru mendizalek Groenlandian barrena egin duten ibilaldiaren berri: 2.300 kilometro egin dituzte izotzetan oinez, sekulako hotza eta haizea pairatuz. Zertarako?, diot nik neure baitan, zer demostratzeko? Eta ezertarako nekatzearekin plazer hartzen duen jendea dagoela onartuz ere, zergatik ez dute isilean egiten, albistegien bitartez eredu triste eta nekagarri hori eman ordez?

Honen ondorioz plazer hartzea gaizki ikusia dago, beti ere programatua ez dagoenean, festetan, adibidez. Noiz agertuko ote da zelai batean dagoen bikote baten argazkia, esanez oso zoriontsu daudela sei aldiz egin dutelako larrutan arratsalde honetan? Seinale ona litzateke. Artistak ere ez dira ausartzen esaten asko disfrutatu dutela lan hori egiten; ahopeka esaten dute «oso giro ona izan dugu grabazioan». Noiz esango du idazle batek: «Asko gozatu dut liburu hau idazten, nik adina gozatzen baduzue irakurtzen zoriontsu naiz»?

Tabernetan «gaizki egin dut lo» entzuten zaio jendeari; inori ez diot entzun esaten «ederki egin dut lo». Hango eta hemengo, honen eta haren gaitzak kontatzen ditu jendeak; inork ez du esaten «ederki nago, sasoi betean, indartsu, apetitoarekin, optimista eta lujurios». Zorigaitzaren motiboak lantzen ditugu etengabe, inertziaz eta inkontzientziaz, zoriona gaizki ikusten duen gizartea etengabe indartuz.

Sufrimenduaren baloraziotik dator lanaren goraipamena. Ez da posible, eta ez dut sinesten, gu hainbeste lan egitera etorri garenik bizitza honetara. Emil Cioranek esan zuen: «Lana maldizio bat da (…), eta etengabeko lanaren bitartez soilik errealizatu gaitezkeela pentsatzea eskandalo bat da, ulertezina». Baina euskaldunoi langile etiketa aspaldi jarri ziguten munduan zehar, eta geroztik gure inkontzientean txertatu eta belaunaldiz belaunaldi transmititzen den zigorra bihurtu da gure garunetan. Lan asko egiteak plusbaliak eransten dizkio zure irudiari: fina zara, konfiantzakoa, serioa, arduraduna. Ikusia nago alferraren etiketa erabiltzen dibortzio batean senarraren aurka.

Lan asko eginda gauza asko eros ditzakezu, baina denbora gutxiago duzu bizitzeko. Halere, jendeak nahiago du bizitza-esperientziari uko egitea ondasun materialei baino.

Lanaren fruitua da diruaren laudorioa. «Asko irabazten du» esateak beste definizio guztiak ezabatzen ditu. Jendea zorpetu da ez zegokion bizi-maila bat lortzeko, klase konplexua erraietaraino sartua zeukalako, pobrezia baita tabu nagusia gure herrian.

Balore onak asko ditugu, baina zorion ororen sorburua aurkitzeko oztopatzen duen hura kentzea da bide bakarra. Zoriona ez delako metaketa, soilketa baizik.

PAKO ARISTIK Berrian idatzia da goiko hori (2011-VII.1). A ze ederra, ez da?

Eleder BuM31    Mind Mapping-Open Space Technology-Creativity

www.burumapak.blogspot.com (eus)   @Eleder_BuM  (Twitter)
www.in-fluyendo.blogspot.com (esp)   www.flowandshow.blogspot.com

HEZKUNTZA MUNDUAN ESPAZIOA IREKITZEN: hedabideetakoak

Zorionekoak gu Hik Hasiko jendearekiko harremana dela eta. Hari esker lehenegoz izan gara egun bi eta erdiko Espazio Irekikoa (hemen elkarlanean idatzi genuen gonbidapena) en eginda, behar den bezala, beinke :-)!

Gure balorazioa egiteko asti gutxi orain, baina horra hedabideetan agertutako ale bi:

Hemen Berriak uztailaren 8an argitaratutakoa: http://t.co/rKjwqP6

Pasa den astean burutu zuten Donostian, HikHasik antolatuta. Ikastaroan eskolaren papera jarri dute kolokan, edo hobe esanda, ”kolokan jarraitzen du” Eleder Aurtenetxe ikastaro horren bideratzaileak komentatu digunez. Elederrek bere biziko garrantzia eman dio erabilitako metodologiari, Espazio Irekia izeneko ari alegia.

Bilbo Hiria irratiko webgunean jarritako testua da goiko hori. Aurreko astean Donostian egun bi eta erdiko Espazio Irekiaren inguruko solasaldia izan dugu gaur bertan. Hemen elkarrizketa entzungai eta deskargagai: http://www.bilbohiria.com/web/10668. Esker mila, Bilbo Hiria Irratiko lagunak!

Ondo bizi!

Eleder BuM31    Mind Mapping-Open Space Technology-Creativity

www.burumapak.blogspot.com (eus)   @Eleder_BuM  (Twitter)
www.in-fluyendo.blogspot.com (esp)   www.flowandshow.blogspot.com

KUKU.KUKU!

Bideo ederra eta kutsagarria, inondik ere, baina, bigarrenez ikustean etorri zait eta ezin bota barik utzi... are ederragoa leitike, bertan play-backa ari direnen ahots errealez osatua izan balitz, ez da? Beharbada muntatzen zailagoa, baina, seguru freskoagoa, benetakoagoa,akasdunagoa,... ederragoa :-)!

Lehenengotik hirugarrenera
4. pisutik espaziora
Metro karratuetatik kilometroetara
Ezerezatik osotasunera
Txikitasunetik handitasunera
Ametsetatik errealitatera
Eskuak altzatuz erabakiak,
Eskuak batuz eraikia,
Eskuak nahastuz zabaldua.
Kukutza, bihotz bat gure aurrean,
Hutsa betetzen duena
Taupadaka esnatuz geldirik gaudenak.
Taupadaka esnatuz lotan gaudenak
Taupada bakoitzaz koloreztatuz zuri beltza
Taupada bakoitzaz irribarre bat
Ideiak bultzatuz erabakiak,
Ideiak batuz eraikia,
Ideiak nahastuz zabaldua.
Kukutza, bihotz bat gure aurrean,
Indarrez betetzen gaituena
Taupadaka esnatuz etsita gaudenak
Taupadaka esnatuz minduta gaudenak
Taupadaka esnatuz geldirik gaudenak
Taupadaka esnatuz lotan gaudenak
Taupadaka esnatuz etsita gaudenak
Taupadaka esnatuz minduta gaudenak

Espazio Irekiari buruz irakurri baino eginda ez nengoen sasoian, duela 6 urte edo, Kukutzakoek nazioarteko topaketa antolatu zuten asteburu osorako, 2005eko maiatza izango zen.

Bertan itzultzaile ibili ginen eta bertatik bertara ikusi ahal izan genuen kukuen egikera, espazio irekiaren antza handia zuen egikera, berez belaunaldiz belaunaldi gazte haiengana heldutakoa...
eta gaur ere bizi-bizi dagoena, antza!

Gertatuko dena gertatuta, konturatu zein konturatu ez, izena erabili edo ez,... bizi-bizi autoeraketa Bilbon, eta mundu osoan, une oro :-)!

Ralph Copleman zen/denak liluratuta omen zioenez, "Everything is moving, everything is moving!" Arriskuan baina bizi-bizi, aukerak sortu eta sortu ari da etengabe bizitza... segi kukuka eta ondo-ondo bizi!

Eleder BuM31    Mind Mapping-Open Space Technology-Creativity

www.burumapak.blogspot.com (eus)   @Eleder_BuM  (Twitter)
www.in-fluyendo.blogspot.com (esp)   www.flowandshow.blogspot.com